ယုဇနဥယျာဉ်မြို့တော်..NLD ရပ်ကျေးညီလာခံမှာ ဗျာ….

 

နိုဝင်ဘာ ၂၈ ရက်(တန်ဆောင်မုန်း  လပြည့်နေ့)က ၉၄ ရပ်ကွက်၊ ယုဇန ဥယျာဉ်မြို့တော် ဒဂုံဆိပ်ကမ်းမြို့နယ် NLD ရပ်ကျေးညီလာခံကျင်းပခဲ့ရာ အောင်မြင်မှုမရှိဘဲ ပွဲပျက်ခဲ့သည်။ ယုဇန NLD  ကွဲနေသည့် သတင်းတွေကကြား နေရသည်။ ညီလာခံမတိုင်မီ တစ်ရက် လူငယ် ကျား၊မ (၂)ဦး ဂျာနယ်တိုက်ကို ဖိတ်စာလာပို့သည်။ ထူးခြားသည်က ရပ်ကျေး/မြို့နယ်ကော်မရှင်က ဖိတ်ခြင်း မဟုတ်ဘဲ ကွဲနေသော အစုအဖွဲ့တစ်ဖက် က ပုဂ်္ဂိုလ်တစ်ဦးအမည်ဖြင့် ဖိတ်ကြား ခြင်းဖြစ်သည်။ ညီလာခံစောင့်ကြည့်ရေး အဖွဲ့ဟုကင်ပွန်းတပ်ထားသည်။

ညီလာခံနေ့တွင် ညီလာခံ မစတင် မီ ကွဲနေသော အစုတစ်စုမှ ပုဂ်္ဂိုလ်များ၏ အမည်စာရင်းစာရွက်တွေ ဝေနေတာ တွေ့ရသည်။ ကော်မရှင်က ၎င်းစာရွက် များဝေခြင်းသည် တရားဝင် ကော်မရှင် က ဝေခြင်းမဟုတ်ဘဲ မိမိကြိုက်သူကိုသာ အဆိုပြု တင်သွင်းကြရန် ကြေညာသည် ကို ကြားရသည်။
ဂျာနယ်များသို့ ဖိတ်ကြားခဲ့သည့် ပုဂ်္ဂိုလ်ကလည်း မီဒီယာအချို့နှင့် ပွဲမစမီ အင်တာဗျူးနေသည်ကို တွေ့ရသည်။ ညီလာခံအပြင်အဆင်က အသွင်သဏ္ဍာန် ကောင်းသည်။လျို့ဝှက်ဆန္ဒပြုခန်းများ၊ မဲ ထည့်ရန် ပုံးများပါဝင်သည်။ ညီလာခံ စတင်ကျင်းပရာ ဖိတ်ကြားသူ သုံးရာ ကျော်၊ တက်ရောက်သူ နှစ်ရာ့လေးဆယ် ကျော်ရှိ၍အထမြောက်ကြောင်းကြေညာ ကာ အဆိုပြုခြင်းကို ဆောင်ရွက်ရာတွင် တက်ရောက်လာသူများက လူ(၄၀)ကို အဆိုပြုခဲ့ကြသည်ကို အထဲကမှ ၁၁ဦး ကို မဲစနစ်ဖြင့် ရွေးချယ်ကြသည်။
ဤတွင် ပြဿနာက ၀င်လာသည်။ မဲလာထည့်ရန် အမည်ခေါ်ယူရာတွင် (၈)ယောက်တစ်တွဲ ခေါ်ရာ နှစ်ယောက် သုံးယောက်သာ ထလာကြသည်။နောက် ဆုံးတွင် မဲပေးသည့် အစီအစဉ်ပြီးဆုံးပြီ ဖြစ်ကြောင်း ကြေညာလိုက်ရာ မဲမထည့် ရသေးသူများ ကျန်ရစ်နေသည်ဟု ဆိုကြ သည်။ အမည်များ မပါဝင်သဖြင့် ကျန် ရစ်ခဲ့ကြခြင်းဖြစ်သည်ဟု ဆိုကြသည်။
တစ်ယောက်တစ်ခွန်း ကန့်ကွက် ပြောကြားမှုများ ပြင်းထန်လာပြီး ကော်မရှင် တာဝန်ရှိသူများထံ ၀ိုင်းအုံလာကာ ၀ိုင်းဝန်း ပြောဆိုခဲ့ကြသည်။ ကော်မရှင် တာဝန်ရှိသူများက နေရာတွင် ပြန်ထိုင် ကြရန်၊ တစ်ယောက်တစ်ပေါက် ပြောနေ လျှင် ရှင်း၍မရကြောင်း၊ ငြိမ်သက်စွာနေ ပေးကြရန်၊ မေတ္တာရပ်ခံကြောင်း မဲထည့် လို့ရအောင် ရှင်းပေးမည်ဖြစ်ကြောင်း အကြိမ်ကြိမ် မေတ္တာရပ်ခံခဲ့သော်လည်း လိုက်နာခြင်းမရှိသူက အများစုဖြစ်နေ သည်။ မဲပေးရန် ကျန်ရစ်ခဲ့သူများတွင် အကြောင်းအမျိုးမျိုးကြောင့် ရောက်ရှိ ကြောင်း လက်မှတ်မထိုးခဲ့သူများလည်း ပါဝင်နေသည်ကို တွေ့ရသည်။
ဒဂုံမြို့သစ် ဆိပ်ကမ်းမြို့နယ် ပြည် သူ့လွှတ်တော်ကိုယ်စားလှယ်  NLD ဒေါက်တာမျိုးအောင်က အခြေအနေကို ထိန်းသိမ်းသည့်အနေဖြင့် ““အမှားအယွင်း ရှိသွားတဲ့အတွက် အခု ဒီနေ့လုပ်တဲ့ပွဲက တော့မအောင်မြင်ဘူး။သူတို့ အဆင့်ဆင့် တင်ပြပါမယ်။ (၇)ရက် ကြိုပြီး ဖိတ်ပါ မယ်။ ဒီထက်ပိုပြီး စနစ်ကျအောင် ဆောင်ရွက်ပါမယ်။ နောက်တစ်ပိုင်းက ဒီကိစ္စဖြစ်ရတာကို စုံစမ်းစစ်ဆေးရေး ကော်မရှင်နဲ့ ပြန်စုံစမ်းပြီး သင့်တော်တဲ့ အရေးယူမှုတွေဆောင်ရွက်ပေးဖို့ ကျွန် တော် တင်ပြပေးပါ့မယ်။ ကော်မရှင် ကိုယ်စား ကျွန်တော်ပြောပြခြင်းဖြစ်ပါ တယ်””ဟု မကျေမနပ်ဖြစ်နေသော NLD ပါတီဝင်များကို ပြောကြားခဲ့ရာ ပါတီဝင် များက အရေးယူပေးရန်နှင့် ညီလာခံ ကျင်းပရေးကော်မရှင်ကိုလဲလှယ်ပေးရန် ၀ိုင်းဝန်းအော်ဟစ်ပြောကြားခဲ့ကြသည်။
ဒေါက်တာမျိုးအောင်အနေဖြင့် အဆိုပါစကားပြောကြားနိုင်ရန်အတွက် တက်ရောက်လာသော ပါတီဝင်များကို နားထောင်ပေးပါရန် အတန်ကြာ မေတ္တာ ရပ်ခံပြီးမှ ပြောကြားခဲ့သည်ကို တွေ့ရ သည်။
ဒေါက်တာမျိုးအောင် ပြောကြား အပြီးတွင် တက်ရောက်လာသူများက ပြန်ရန် ပြင်ဆင်နေစဉ် မဲမပေးရသေးသူ များ လက်မှတ်လာထိုးကြပါဟု ဆိုကာ လက်မှတ်များစုဆောင်းမှု ပြုခဲ့ကြသည် ကိုလည်း တွေ့ရသည်။
အဆိုပါအချိန်တွင် ကိုသားလေးဆို သူက ခုံတစ်ခုံပေါ်တက်ကာ ““ဒီရွေး ကောက်ပွဲကတော့ လုံးဝယုတ်ညံ့စွာနဲ့ ပျက်စီးသွားပါပြီ။ အဲဒီတော့ ကျွန်တော် တို့က ဒါကို လက်ခံလို့မရတဲ့အတွက် ကြောင့် နောက်တစ်ကြိမ် ရွေးကောက်ပွဲ ကို ပြန်ခေါ်ကြမယ်။ ခေါ်တဲ့အခါမှာ လည်း ကျွန်တော်တို့က သိသာမြင်သာ အောင်လို့ ဖြစ်နေရပါမယ်။ ကျွန်တော် တစ်ခု ပြောချင်ပါတယ်။ ဒီနေ့မှာ ဘာ ဖြစ်လည်းဆိုတော့ ရွေးကောက်ပွဲကို””ဟု ပြောဆိုနေစဉ်မှာပင် ပင်နီဝတ်ပါတီဝင် တစ်ဦးက လူအုပ်ကို တိုးဝင်လာပြီး ကိုသားလေးပြောနေသော မိုက်ခွက်ကို လုယူလိုက်စဉ် ၀ရုန်းသုန်းကားဖြစ်ကာ ဆွဲကြလွဲကြ ခုံနှင့်ပစ်သူကပစ်၊ မိုက်လု သွားသူနောက် လိုက်သူကလိုက်၊ တား သူက တားဖြစ်နေကြစဉ် ပရိသတ်အတွင်း ၌လည်း အပြန်အလှန်ထိုးကြိတ်ခြင်း အချို့ဖြစ်ပေါ်နေခဲ့သည်ကို တွေ့ရသည်။
ညီလာခံပျက်သွားပြီးနောက် ကော် မရှင်နှင့်ပါတီဝင်အချို့ကို ယင်းနေ့တွင် ပင် လိုက်လံမေးမြန်းခဲ့ရာ ၀င်ရောက်အရွေး ခံသည့် ဦးထွန်းဝက ““ဒီ ညီလာခံမှာ ပြည် သူတွေဟာ အချိန်ပေးပြီး လာတက်ပါ တယ်။ ကထိန်နေ့ကြီးတောင်မှ သင်္ကန်း လှူတာတို့ ကျောင်းသွားတာတို့ မပြုဘဲ နဲ့ ညီလာခံကို တက်ပါတယ်။ ညီလာခံ တက်ရောက်သူပေါင်းက (၂၄၄)ဦးရှိပါ တယ်””ဟု ပါတီဝင်ပေါင်းက (၈၉၄)ဦး၊ သူတို့ကြေညာချက်အရ (၃၃၀)ဖိတ် ပါတယ်။ (၃၃၀)အပေါ်မှာ သူတို့က ရာ ခိုင်နှုန်းတွက်လိုက်တော့ ၇၃.၉၃ ရာခိုင် နှုန်းဆိုတော့ အထမြောက်ကြောင်း ဖြစ် သွားတယ်။ အဆိုတင်သွင်းမှုနဲ့ ထောက်ခံ မှုပြုပြီးတဲ့အခါမှာ အမှုဆောင်လောင်း (၄၀)ဦးထွက်လာတာပေါ့။ ဒါက မဲပေး ပြီးရွေးရမယ့်အဆင့်ရောက်သွားပါပြီ။ အဲဒီလို မဲပေးပြီးရွေးမယ့်အချိန်ရောက် တော့ မသမာမှုစမြင်ရတယ်။ ဘယ်အချိန် က စမြင်ရလဲဆိုတော့ ကျွန်တော်လက် မှတ်ထိုးတဲ့စာရွက်က ခေါ်တဲ့စာရွက် မဟုတ်တာကို တွေ့ရတယ်။ ကျွန်တော် အစည်းအဝေးတက်တုန်းက သူတို့ attendance  ယူတယ်။ ကျွန်တော် အဲဒါကို ဓာတ်ပုံရိုက်ထားတယ်။ ခေါ်တဲ့အခါကျ တော့ မဟုတ်တော့ဘူး။ စီနီယာအလိုက် မဟုတ်တော့တာသိတယ်။ ဘေးကို မေး ကြည့်တော့ ““ဟာ မင်းပျောက်ပြီ ထင် တယ်””တဲ့။ မကြာခင်ပဲ လုပ်ရင်းလုပ်ရင်း ကနေ ပါတီဝင်က ကုန်ပါပြီလို့ ကြေငြာ လိုက်တဲ့အခါကျတော့ ကျွန်တော်နောက် မှာ တို့ဘက်ကို ထောက်ခံပေးမယ့် ပါတီ ၀င်တွေက အများကြီးကျန်ပါသေးတယ်။ ရာချီကို ကျန်သေးတဲ့အခါကျတော့ မခံ မရပ်နိုင်ဖြစ်ပြီး မေးမြန်းတဲ့အခါကျတော့ အဖြေက ထွက်ပေါ်မလာဘူး။ ကိုသား ငယ်ဆိုတဲ့ ပုဂ်္ဂိုလ်ဟာ စာရင်းမှားတယ်လို့ ကြေညာလိုက်တဲ့အခါကျတော့  ပြည်သူ တွေဟာ ပိုပြီးတော့ မခံမရပ်နိုင်ဖြစ်လာ တာပေါ့။ မမှားသင့်တဲ့ စာရင်းပဲ။ ကော် မရှင်ဥက္ကဋ္ဌဟာ ဒီအမှားမျိုး လုံးဝမှားခွင့် မရှိဘူး။ ဘာနဲ့တူလဲဆိုရင် ကျွန်တော်လူ တစ်ယောက်ကို မှားပြီး သတ်မိရင်လည်း ပုဒ်မတပ်ရမှာပဲ။ ကော်မရှင်လည်း ထို နည်းလည်းကောင်းပဲ။ ဒီအမှားကို မှားပြီး လုပ်မိတာနဲ့ပဲ NLD ပါတီကို လုံးဝ ထိ ခိုက်သွားပြီ။ ကျွန်တော်တို့ ဥက္ကဋ္ဌကြီး ဒေါ်အောင်ဆန်းစုကြည်ကလည်း တရား ဥပဒေစိုးမိုးရေးနဲ့ အေးချမ်းသာယာရေး ဥက္ကဋ္ဌ တာဝန်ယူထားတယ်။ နိုင်ငံတော် ကပေးထားတာ။ ဒီညီလာခံရွေးကောက် ပွဲကလေးတောင်မှ တရားဥပဒေစိုးမိုးမှု မရှိဘူး။ ညီလာခံအေးချမ်းမှုမရှိဘူးဆိုလို့ ရှိရင် NLD ကို ဘယ်လောက်ထိခိုက် သွားလဲ။ ကျွန်တော်တို့ အဲဒါကို သိပ်ပြီး ၀မ်းနည်းတယ်။ ကော်မရှင်အပြစ်လို့ ကျွန်တော်မြင်တယ်။ ရဲရဲလည်းရင်ဆိုင် ရဲ တယ်။ ကော်မရှင်အမှား၊ ကော်မရှင် အပြစ်၊ တမင်ကလာမှားအောင် လုပ် ထားတယ်။ ဒါ ကျွန်တော့်အမြင်ပဲ ဒီစာ ရင်းကမဲထုတ်တုန်းက စာရင်းဆိုရင် လည်း အားလံုးပါလာရမယ်။ ၈၉၄ ယောက်စလုံး တက်ရောက်သူဆိုရင် လည်း ၂၄၄ စလုံးပါရမယ်။ ဘာကြား စာရင်းလဲ၊ ဒါက ၀င်လာရတာလဲ၊ လူ တွေ ရန်ဖြစ်အောင် သတ်ဖြတ်ကြအောင် ဒါက ဖန်တီးလိုက်တာပဲ။ ညီလာခံပျက် ပြားအောင် လုပ်လိုက်တာပဲ။ ဒါကို ကျွန် တော်တို့ပါတီပိုင်းကရော ဥပဒေပိုင်းက ရော ဆက်လက်ပြီး ဆောင်ရွက်သွားမှာ ပါ””ဟု ပြောကြားခဲ့သည်။
NLD ဗဟိုသို့လည်း  အချက်အ လက် ပြည့်ပြည့်စုံစုံကိုစာဖြင့် ဗီဒီယိုမှတ် တမ်းခွေပါထည့်သွင်းတင်ပြသွားမည်ဖြစ် ပြီး တိုင်း(သို့မဟုတ်) ဗဟိုမှ ကြီးကြပ်ကာ ညီလာခံ လာရောက်ကျင်းပပေးရန် တောင်းဆိုသွားမည်ဖြစ်ကြောင်း ၎င်းက ထပ်မံပြောကြားသည်။
““ဒီမှာက လူတွေအချင်းချင်း နေရာ လုတဲ့အတွက်ကြောင့် ဖြစ်တာပါ။ ဟိုလူ တွေကျတော့ နေရာလုစရာမရှိပါဘူး။ မှန်မှန်ကန်ကန် လုပ်သွားနိုင်ပါလိမ့်မယ် လို့ ကျွန်တော်တို့လည်း ယုံကြည်ထား တယ်””ဟု ၎င်းက ပြောသည်။
ညီလာခံမအောင်မြင်သဖြင့် (၉၄) ရပ်ကွက်ညီလာခံကိစ္စကို ဆိုင်းငံ့မထား စေလိုကြောင်း ၉၄ ယုဇနနေ ပြည်သူ များမှာ ဒဂုံဆိပ်ကမ်းမြို့နယ်တွင် လူဦး ရေများပြားသောကြောင့် မဆိုင်းငံ့ထား သင့်ကြောင်းလည်း ၎င်းကပြောသည်။
ဝင်ရောက် အရွေးချယ်ခံခဲ့သည့် ကိုစိုင်းကျော်သူက ““ညီလာခံကျင်းပပြီဆို ရင် အခြားရပ်ကွက်တွေမှာရော၊ ညီလာ ခံရဲ့လုပ်ထုံးလုပ်နည်းအရရော၊ ညီလာခံ ကိုတက်ရောက်လာတဲ့ ပါတီဝင်အင်အား စာရင်းကို ညီလာခံမကျင်းပမီမှာ ကြိုပြီး ကြေညာရပါတယ်။ ဒါပေမဲ့ ညီလာခံ ကျင်းပပေးသွားတဲ့ ကော်မရှင်ကတော့ အဲဒီစာရင်းကို ကြိုတင်ကြေညာခြင်းမရှိ ဘူး။ အဲဒါကတော့ အားလုံး အသိပဲ။ ပရိသတ်အားလုံးလည်း အမြင်ပဲ။ အဲဒီလို ကြိုတင်ကြေညာခြင်းမရှိဘဲ သူတို့ဆီကို ၂၄၀ တက်ရောက်လာတဲ့အခါကျတော့မှ သာလျှင် ၃၃၀ ဖိတ်ပါတယ်လို့ ကြေညာ တာ။ အမှန်တကယ်က ညီလာခံကိုလာ ရောက် တက်ရောက်တဲ့စာရင်း၊ မကြေ ညာခင်မှာ ဘာကို ကြေညာပေးရမလဲဆို ရင် ညီလာခံကို ဖိတ်ကြားတဲ့ စာရင်းကို ကြေညာပေးရမှာပါ။ အဲဒါလဲ သူက ပထမပျက်ကွက်တယ်။ သူမှားတာဘာ ကြောင့်လဲဆိုတဲ့ အကြောင်းပြချက်က ကျွန်တော်တို့အတွက် နောက်ထပ်စဉ်း စားစရာ အချက်တစ်ချက် ထပ်ထွက် လာတာပေါ့။ ညီလာခံနဲ့ ပတ်သတ်လို့ ဒီနေ့လုပ်သွားတာက လပြည့်နေ့။လပြည့် နေ့နဲ့ ပတ်သက်လို့ ညီလာခံကို ကျွန် တော်စာတစ်စောင်ရေးတင်ပါတယ်။ လပြည့်နေ့မှာ လုပ်လို့ရှိရင် ကထိန်ရှိ တယ်။ စတုဒိဿာရှိတယ်။ နိဗ္ဗာန်ဈေးရှိ တယ်။ ဒါကြောင့်မို့လို့ ပါတီဝင်တွေ စုံစုံ လင်လင်တက်ရောက်နိုင်ခြင်းမရှိနိုင်ဘူး။ အဲဒီအခါမှာ ညီလာခံရဲ့ အနှစ်သာရ မပြည့်နိုင်ဘူးလို့ ကျွန်တော်စာရေးပြီး တင်ပါတယ်။ ကျွန်တော်ထင်တာက နောက်ကျပါသေးတယ်။ မြို့နယ် ကော်မ ရှင်က ဒေါက်တာဖြူဖြူခိုင်ပြောတယ်။ နောက် တိုင်းကော်မရှင်က ကိုသားလေး ကဒါကို အကြံပေးပြီးပြောတယ်။ ဒါပေမဲ့ အဲဒါကို သူတို့ပြင်ဆင်ခဲ့ခြင်းမရှိဘူး။ အဲဒီ နေ့ကို ဘာကြောင့်ရွေးပြီး သူတို့ကျင်းပ ရသလဲဆိုတာ စဉ်းစားဖို့တစ်ခုကောင်း တာပေါ့နော်။ အဲဒီမတိုင်ခင်ကကော ညီ လာခံနဲ့ပတ်သက်လို့ ဘယ်လို မဲပေးရ မယ်၊ ဘာကြောင့်မဲပေးရမယ်၊ ဘယ်သူ တွေကိုမဲပေးရမယ်၊ ညီလာခံကျင်းပရ ခြင်းရဲ့ အနှစ်သာရနဲ့ ရဖို့ရည်ရွယ်ချက် က ဘာလဲဆိုတာ ညီလာခံကော်မရှင်က ညီလာခံသာ ကျင်းပပြီးစီးသွားတယ်။ လုံးဝ ပြောကြားခဲ့ခြင်းမရှိဘူး။ သူတို့တွေ က တောက်လျှောက် ဆက်တိုက်ဆက် တိုက် တစ်ခုပြီးတစ်ခု မှားလာခဲ့တဲ့အချိန် ကျတော့ သူတို့ လုပ်ဆောင်ရမယ့် အ လုပ်တွေ မလုပ်ခဲ့ဘူး။ နောက် မလုပ်ရ မယ့်ရက်မှာလည်း လုပ်ခဲ့တယ်။ သူတို့ လုပ်ဖို့ အလုပ်တွေလည်း ညီလာခံထဲ ရောက်မှ ဘာကြောင့် ပျက်ကွက်သလဲ။ အဲလို ပျက်ကွက်တဲ့ကိစ္စတွေ ပေါ်လာပြီး ကာမှ နောက်ထပ်အမှားကြီးတွေကို ဆက်တိုက်ဘာကြောင့် ကျူးလွန်သွား သလဲဆိုတာ စဉ်းစားစရာရှိလာတယ်။
NLDမြို့နယ်ညီလာခံကျင်းပရေး ကော်မရှင်အတွင်းရေးမှူးလည်းဖြစ်ပြီး ဦးသိင်္ခက ညီလာခံပျက်ခဲ့ရခြင်းနှင့်ပတ် သက်၍ ““ကျွန်တော်ပြောချင်တာက ကျွန် တော်က အခုလက်ရှိ မြို့နယ်ကော်မရှင် အတွင်းရေးမှူး ညီလာခံစည်းမျဉ်းအရ ကျွန်တော်တို့ (၉၄)ရပ်ကွက်ကို ရပ်ကျေး ကော်မရှင်တွေတောင် ကိုယ့်ရပ်ကွက်ကို ညီလာခံနဲ့ပတ်သက်ရင် တာဝန်မရှိဘူး။ အခြားရပ်ကွက်တွေကနေ ပြောင်းလဲပြီး တာဝန်အလှည့်ကျပေးထားတာ။ တကယ့် တကယ် တာဝန်ရှိတာက ဒီ(၉၄)ရပ်ကျေး ကို ဦးစီးကျင်းပပေးတဲ့ (၈၈)ရပ်ကွက် ညီလာခံကျင်းပရေးကော်မရှင်မှာပဲ လုံး လုံးလျားလျား တာဝန်ရှိတယ်။ အခု ဖြစ် သွားတဲ့ ကိစ္စမှာ သံသယဖြစ်ဖွယ်ရာတွေ အများကြီးတွေ့နေရတယ်။ မဲမပေးရ သေးတဲ့ လူတွေရဲ့ လက်မှတ်ကို လာထိုး ပါ၊ လာထိုးပါဆိုပြီး လှုံ့ဆော်တဲ့သူ့ရဲ့ လက်ထဲမှာလက်မှတ်စုဆောင်းဖို့အတွက် စနစ်တကျ ချထားတဲ့ ဇယားနဲ့ စာရွက် တွေ အမြောက်အများပါလာတယ်။ ပါ လာတယ်ဆိုတဲ့ အနေအထားကလည်း ဒီလိုအနေအထားကို ဖြစ်မယ်လို့ ရည် ရွယ်ပြီးတော့မှ လုပ်တာလို့ သုံးသပ်လို့ရ  တယ်။ နောက်တစ်ချက်က ဒီ ၈၈ ရပ် ကွက်ရပ်ကျေးကော်မရှင်ကို ကျွန်တော် တို့ ကိုယ်တိုင်က ယခင်ကတည်းက သံ သယရှိနေတဲ့အထဲမှာ ပါတယ်။ ဘာ ကြောင့်လဲဆိုတော့ ကျွန်တော်တို့ကို အခု အတိုက်အခံလုပ်နေတဲ့ ဦးထွန်းဝတို့၊ ကို ကျော်သူတို့နဲ့ အမတန် ရင်းနှီးတဲ့ ပုဂ်္ဂိုလ် တွေမို့လို့ ဒီပွဲကြီးကို ကျွန်တော်တို့ကိုယ် တိုင်က လုံးဝ သံသယရှိတယ်။ တိုင်းက ဦးဘိုဘိုဦးက ဒီကိစ္စကို အချိန်မီ မြန်မြန် အစီအရင်ခံစာရေးတင်ပေးပါတဲ့””ဟု ပြောကြားခဲ့သည်။

၉၄ ရပ်ကွက် NLD ရပ်ကျေးကော် မရှင်ဥက္ကဋ္ဌလည်းဖြတ်ပြီး ၀င်ရောက် အ ရွေးချယ်ခံခဲ့သူ ဒေါ်ဝင်းဝင်းချိုက ““ရပ် ကျေးကော်မရှင်က ကိုယ့်ရပ်ကျေးမှာဆို ရင် ကျွန်မတို့က ပြည်သူပဲ၊ ဘာမှ ဒီမှာ လုပ်ပိုင်ခွင့်မရှိဘူး။ ကျွန်မတို့က ပါတီဝင် ကတ်ပြားတွေကို ပါတီဝင်တွေဆီ လက် ၀ယ်ရောက်ရှိအောင် ဖိတ်စာတွေ ဖိတ် ပေးရတယ်။ ကတ်ပြားတွေပို့ပေးရတယ်။ ညီလာခံဖြစ်မြောက်အောင် ကျွန်မတို့က အဆောက်အအုံတွေ၊ နေရာတွေ၊ ဧည့် သည်တွေ လာဖို့နေရာတွေ အားလုံးကို စီစဉ်ပေးရတာ။ ကိုယ့်ရပ်ကွက်ကျရင် ဘာမှ ၀င်ရောက်စွက်ဖက်ခွင့်မရှိဘူး။ ၀င် ရောက်တော့ ရွေးချယ်ခံခွင့်ရှိတယ်။ ဖိတ် ကြားထားတဲ့ လူစာရင်းကို လာကြီးကြပ် တဲ့ (၈၈) ရပ်ကွက်ကော်မရှင်လက်ထဲကို ထည့်ရတယ်။ တက်ရောက်လာတဲ့ လူ စာရင်းကိုလည်း ပေးရတယ်။ သူတို့က တက်ရောက်လာသူ စာရင်းနဲ့  ဖိတ်ကြား ထားသူ စာရင်းနဲ့ ဘယ်နှစ်ရာခိုင်နှုန်းရှိ ရင် အောင်မြင်ပါတယ်ဆိုပြီး သူတို့က ကြေညာပြီးတော့ မဲထည့်ဖို့ခေါ်ပေးရ တယ်။ သူတို့ အကုန်စီမံခွင့်ပဲရှိတယ်။ ကျွန်မတို့ရပ်ကျေးကော်မရှင်နဲ့ဘာမှ စီမံ ခွင့်မရှိဘူး။ အပေါ်ကလည်းမူချထား တယ်။ ကိုယ့်ရဲ့ မဲရမှုကလည်း သူတို့ ပြောသမျှပဲနေရတယ်။ ရပ်ကျေး ကော် မရှင်တိုင်း အဲဒီအတိုင်းပဲ။ ဒီနေ့ ပွဲမှာ တက်ရောက်မယ့် လူ ၃ ရာကျော်အတွက် စာရင်းတွေ အကုန်ပေးလိုက်ရတယ်။ တက်ရောက်လာတဲ့ လူစာရင်းကိုလည်း (၈၈)ရပ်ကျေးကော်မရှင်လက်ထဲကို ထည့်ပေးရတယ်။ တက်ရောက်သူ လက် မှတ်ထိုး လက်ခံတဲ့သူတွေရှေ့မှာပဲ တစ် ခါတည်း ထည့်ပေးတာ။ လက်ခံတဲ့သူ တွေကလည်း တခြားရပ်ကွက်ကပဲ လာ ကူကြတာ။ အဲဒီ စာရင်းတွေ အပ်လိုက် တာနဲ့ ကျွန်မတို့နဲ့ဘာမှမဆိုင်တော့ဘူး။ ဘယ်သူ ရိုးသားတယ်၊ မရိုးသားဘူးဆို တာကတော့ ကျွန်မတို့ကတော့ ကိုယ့် ကိုယ်ကိုပဲ တာဝန်ယူတတ်တယ်။ ကိုယ့် တာဝန်ဖြစ်တဲ့ ပါတီဝင်တွေဆီကို ပါတီ ၀င်ကတ်တွေပို့ပေးတယ်။ တက်ပါမယ်ဆို တဲ့သူတွေဆီကို ဖိတ်စာပို့ပေးတယ်။ ဒီ ဘက်အပိုင်းမှာ မှားသလား၊ မှန်သလား ဆိုတာတော့ ကာယကံရှင်လုပ်တဲ့သူတွေ ပဲ သိမယ်။ မှားတာဆိုရင်လည်း (၈၈) ရပ်ကျေးက လုပ်တာပဲ မှန်တာဆိုရင် လည်း သူတို့လုပ်တာပဲ။ ညီလာခံမလုပ် ခင်မနေ့က ကိုစိုးမိုးကျော်သူ ဦးထွန်းဝနဲ့ ပါတီဝင် ၁၀ ဦးလက်မှတ်ရေးထိုးပြီး ညီ လာခံကို နောက်ရွှေ့ပေးပါဆိုပြီး စာလာ တင်တယ်။ ညီလာခံလုပ်မယ့်ရက်ကို အထက်ကို ၁၀ ရက်ကြိုတင်ရတယ်။ ၈ ရက်လောက်ကြိုပြီး ချပေးတယ်။ ၇ ရက် ကြိုပြီး ဖိတ်စာဖိတ်ရတယ်။ ဒီလို အခြေ အနေမှာ နက်ဖြန်လုပ်ရမယ့်ပွဲမှာ ဒီနေ့ လာပြီး ဒီပွဲနောက်ဆုတ်ပေးပါဆိုိပြီး လာ ဖျက်တဲ့ အပေါ်မှာ ကျွန်မတို့ လုံးဝ သံ သယရှိတယ်။ သူတို့အစီအစဉ်တကျနဲ့ ဒီပွဲကို ဖျက်ခိုင်းတဲ့ပုံစံမျိုးဖြစ်နေတယ်။ ညနေပိုင်းမှာ သူတို့က အစည်းအဝေး ရှိတယ်ဆိုပြီး မိုက်နဲ့လိုက်ကြေညာပြီး ခေါ်တယ်။ သူတို့ ဘာပြောတယ်ဆိုတာ ကတော့ မသိဘူး။ အခုဖြစ်ပြီးတဲ့ အချိန် မှာလည်း မဲမထည့်ရသေးတဲ့သူတွေကို လက်မှတ်လာထိုးလို့ သူတို့ ချပေးတဲ့ စာ ရွက်ဟာ Planဆွဲပြီးသား စာရွက်တွေ ဖြစ်နေခြင်းကို ထောက်ခြင်းအားဖြင့် သူ တို့ဟာဒါကို ကြိုတင်ကြံစည်ထားတာလို့ ကျွန်မတို့က စွပ်စွဲတယ်။ ရိုးရိုးသားသား မဲလာထည့်တဲ့သူဆိုရင် အဲဒီလို (စာရင်း ဇာယားကွက်ချထားသော) စာရွက်မပါ လောက်ဘူး။ ပါလာစရာအကြောင်းလဲ မရှိဘူး။ အကြံအစည်ရှိလို့သာ ဒီစာရွက် ကို ယူလာတာလို့ထင်တယ်။ အဲဒါကျွန်မ အမြင်ပဲ။ ကျွန်တာကတော့ ရိုးသား တယ် မရိုးသားဘူးဆိုတာ (၈၈)ရပ်ကျေး ပဲသိမယ်။ ပါတီဝင် ၈ ရာကျော်ရှိတဲ့ အထဲက ၃ ရာကျော်ပဲဖိတ်တာက ပါတီ ၀င်ကတ်သွားပေးတဲ့အခါမှာ ညီလာခံ တက်ရောက်နိုင်ခြင်းရှိ၊ မရှိမေးတယ်။ တက်မယ်ဆိုတဲ့သူ စာရင်းကို ယူထား တယ်။ ၇ ရက်အလိုမှာ ဖိတ်စာပို့ပေး တယ်။ လပြည့်နေ့ လုပ်တယ်ဆိုတာက ဒီမှာ အလုပ်သမားတွေများတဲ့အတွက် အလုပ်ပိတ်ရက် ရွေးလိုက်ရတာ။ ကျန်တဲ့ ရပ်ကွက်တွေက ကြိုတင်ထားကြတော့ ကျွန်မတို့က စနေ၊ တနင်္ဂနွေရက်မျိုး မရ တော့ဘူး။ ဒါကြောင့်ပါ။
အချိန်ကိုလည်း ၁၂ နာရီလုပ်လိုက် တယ်။ မနက်ပိုင်း ဘုန်းကြီးကျောင်းသွား ဘာသွား ပဒေသာပင်ပို့ပြီးချိန် ၁၂ နာရီ ဆို အားကြပြီဆိုပြီးရွေးလိုက်တာ ဖိတ် ကြားတဲ့စာရင်းတွေ၊ ပါတီဝင်တွေက ကျွန်မတို့ဆီမှာပဲရှိတာမဟုတ်ဘူး။ ဒေါက် တာ ဖြူဖြူခိုင်အိမ်က ကွန်ပျူတာမှာလည်း ရှိတယ်။ ၂၅ ရက်ကလည်း ဦးကျော်သူ တို့က ဦးထွန်းဝအိမ်မှာလုပ်တဲ့ အစည်း အဝေးမှာ ပါတီဝင်တိုင်း အိမ်ကို ဖိတ်စာ နဲ့ ဖိတ်တယ်။ အဲဒါ NLD ပါတီက ကျွန်မတို့ ရပ်ကျေးကော်မရှင်မှအပလုပ် ခွင့်မပေးထားပါဘူး။ ဒါကိုကြည့်ရင် ဒီနေ့ စာရင်းတွေ ဘယ်ကထွက်နိုင်ပါသလဲ။ ဘယ်ကရသလဲ။ ကျွန်မတို့တကယ်ပေး တဲ့ စာရင်းဟုတ်မဟုတ်ဆိုတာ ကျွန်မ တစ်ယောက်တည်း ဆုံးဖြတ်လို့မရဘူး။ သူတို့လက်ထဲရောက်မှ ကျွန်မတို့ ပေး ထားတဲ့ တကယ်စာရင်းဟုတ်မဟုတ်ကို ကြော်ငြာတယ်၊ မကြော်ငြာဘူးဆိုတာ ကျွန်မတို့ မေးခွင့်လည်းမရှိဘူး။ သိခွင့် လည်းမရှိဘူး။ ကျွန်မတို့ကိုလည်း ဘာမှ မဖြေသွားဘူး။ အဲဒီ အဖြစ်အပျက်ဖြစ် ပြီးတာနဲ့ ၈၈ ရပ်ကျေးကော်မရှင် ဥက္ကဋ္ဌ ဦးသောင်းစိန်လုံးဝ ကျွန်မကို အတွေ့အခံ ဘဲ ပျောက်သွားတယ်။ စာရွက်တွေလည်း သူတို့ပဲယူသွားတယ်။ ကျွန်မတို့ကိုဘာမှ မပြသွားဘူး။ အဲဒီအတွက် ကျွန်မတို့ ပေး ထားတဲ့ စာရင်းလား၊ သူတို့ဟာသူတို့ လုပ်ပြီး ယူလာတဲ့စာရင်းလားဆိုတာ ကျွန်မမပြောနိုင်ဘူး””ဟု ပြောကြားခဲ့ သည်။
NLD ပါတီဝင်မဟုတ်သော်လည်း ညီလာခံသို့တက်ရောက်ခဲ့သည့် ပြင်ပ ကျောင်းဆရာ ဦးကျော်သာ(ခ)မင်းတေဇက ““ကျွန်တော့်အမြင်ကတော့ တာဝန် ယူပြီး ဆောင်ရွက်ရတဲ့ ပုဂ်္ဂိုလ်တွေက တာဝန်ပိုင်းဆိုင်ရာကို ကျေပွန်အောင် မထမ်းဆောင်လို့ ဖြစ်သွားတယ်လို့ထင် တယ်။ ဒါက ပါတီတွင်းရွေးချယ်ပွဲဖြစ်လို့ လက်ရှိလည်း ပါတီမှာ အရွေးချယ်ခံထား ရတဲ့ လွှတ်တော်ကိုယ်စားလှယ်လည်းရှိ တယ်။ ညီလာခံကို လွှတ်တော်ကိုယ်စား လှယ်ကိုယ်တိုင် တက်တယ်။ ညီလာခံမှာ လုပ်ငန်းပိုင်းဆိုင်ရာ အားနည်းချက် ကြောင့် ညီလာခံပျက်သလိုမျိုးဖြစ်သွား တယ်။ အဲဒီလို ဖြစ်သွားတဲ့ အပေါ်မှာ လွှတ်တော်ကိုယ်စားလှယ် ဒေါက်တာ မျိုးအောင်ကိုယ်တိုင်က နောက်တစ်ပွဲ ထပ်လုပ်ဖို့ ပြောလိုက်တယ်ဆိုရင်respect ကတော့ ရှိရမယ်။ ပါတီဝင်အချင်းချင်း အောက်ခြေပဲဖြစ်ဖြစ်၊ အဲဒီမှာ အပြန် အလှန်လေးစားမှုသာရှိခဲ့မယ်ဆိုရင် ရုန်း ရင်းဆန်ခတ်ဖြစ်စရာအကြောင်းမရှိဘူးလို့ ကျွန်တော်မြင်တယ်။ ကိုယ်စားလှယ်ကြီး ပြောပြီးတဲ့နောက် အားလုံး လက်ခံသွား ပြီးတဲ့နောက်မှာ ထပ်ဖြစ်တဲ့ အဓိကရုဏ်း ကတော့ အချင်းချင်းအပြန်အလှန် လေး စားမှုတွေ အားနည်းနေတယ်လို့ ကျွန် တော်မြင်တယ်။ ကျွန်တော်တို့ပြည်သူ တွေက political knowledge အတော် လေး အားနည်းနေသေးတယ်လို့ ပြော ချင်တယ်။ NLDပါတီဝင်တွေ ပြောပြော နေတဲ့ အမေကို တကယ်ချစ်တယ်ဆိုရင် ကော်မရှင်ကလည်း စေတနာပါပါ ဆောင်ရွက်မယ်၊ လူတွေလည်း  စည်းနဲ့ ကမ်းနဲ့ လိုက်နာမယ်ဆိုရင်တော့ ဖြစ်စ ရာ အကြောင်းမရှိဘူးလို့ ကျွန်တော် ထင်တယ်။ ရွေးချယ်ခံတွေကလည်း ငါ နေရာရရှိရေးဆိုတဲ့ အတ္တကို ရှေ့တန်း တင်ပြီးတော့ သွားနေတဲ့အတွက်ကြောင့်ု မို့လို့လည်း ဒီလို ထိန်းသိမ်းလို့မရတဲ့ အ နေအထားမျိုးဖြစ်သွားတယ်လို့ ထင် တယ်။ နိုင်ငံရေးနဲ့ပတ်သက်လို့ လုပ်စား မယ့်သူတွေဟာ တကယ်တမ်းသာ စေ တနာပါမယ်ဆိုရင် မလုပ်စားပဲနဲ့ ပြည်သူ အကျိုးပြုလုပ်ငန်းတွေကို ပွင်လင်းမြင် သာတဲ့ပုံစံမျိုးနဲ့ အားသွန်ခွန်စိုက်ကြိုးစား ပြီးတော့ အလုပ်လုပ်ပြီးတော့မှ အလုပ် ကပေးသော နေရာကို လက်ခံပါလို့ ပြောချင်တယ်။ အလုပ်ကပေးတဲ့ နေရာ ကို လက်မခံဘဲနဲ့ နေရာအတွက်ပဲ အ လုပ်လုပ်မယ်ဆိုရင်တော့ ဒီလိုပြဿနာ မျိုးတွေဟာ ဒီနေရာမှာမှ မဟုတ်ဘူး။ နေရာတိုင်းနေရာတိုင်း၊ ဒီပါတီမှ မဟုတ် ဘူး။ ပါတီတိုင်း ပါတီတိုင်း၊ ဒေသတိုင်း၊ ဒေသတိုင်းမှာတော့ ဖြစ်နေဦးမယ်လို့ ကျွန်တော်ထင်တယ်””ဟု ၎င်း၏ အမြင်  ကို ပြောကြားခဲ့သည်။ အဆိုပါ ညီလာခံသို့တက်ရောက် ခဲ့သည့် ယုဇနဥယျာဉ်မြို့တော်နေ ဦးလှမိုးက ညီလာခံပျက်ခဲ့ရခြင်းအပေါ် ““ဒီဥစ္စာဖြစ်တာ ဒေါက်တာမျိုးအောင် ( NLD(ပြည်သူ့လွှတ်တော်ကိုယ်စားလှယ်) ပြောပြီးပြီ။ ဒေါက်တာမျိုးအောင်ပြော ပြီးတဲ့အခါမှာ ထပ်ဖြစ်ရတဲ့အကြောင်းက အမှန်က သူတို့စည်းလုံးမှုမရှိတာ။ စည်း လုံးမှုမရှိတဲ့ အပိုင်း၊ ပါတီထဲမှာကွဲနေ တာ။ ကွဲနေတဲ့အခါကျတော့ တစ်ဖက် ကနေ အမြင်စောင်းပြီးတော့ ဒီဥစ္စာကို ထပ်ပြီးတော့ ဖွလိုက်တာပဲ။ ဒါပဲ။ ဒီချို့ ယွင်းချက်ကို ဒီအားနည်းချက်ကို ထပ်ပြီး မီးမောင်းထိုးပြလိုက်တော့ ကျန်တဲ့လူတွေ မထိန်းနိုင်ဘူး။ အဲဒါကနေ ပြဿနာက မမျှော်လင့်ဘဲ ဖြစ်သွားတာ””ဟု ၎င်း အမြင်ကို ပြောကြားခဲ့သည်။

သိုးထိန်း (မြန်မာပြည်သား)

http://www.hotnewsweekly.com